早前，訪問了接受腎臟移植的3腎跑手Peter Chan。今次，找來了捐腎救自己丈夫的馬拉松跑友李少華Dena。
Dena是我訓練班的同學，在同學間輾轉聽聞過她捐腎救人的事，可是詳情不太清楚。在決定找Peter訪問後，就想不如也找找Dena，請她從一個捐腎者角度講講的經歷及看法，卻發現了一個夫婦間不離不棄的動人故事。
「我老公個名叫蔡桂，好易記。」 Dena笑說。「佢17、18歲豈大陸落黎香港捱世界，思想好成熟，樂觀又勇敢。老公臨過身前同我講『任何人都敵唔過時間，死係每個人都需要承受既，我無所謂，唯一牽掛既就係你。』」
Dena的丈夫蔡桂
Dena丈夫廿多歲時，已因腎結石多次進出醫院動手術。隨年紀增長情況更壞，45歲時開始洗腎，51歲被診斷為腎衰竭。當時醫生跟Dena討論由家人做活體捐贈的可能性 : 「因為我老公年紀大，排隊等人地捐贈會被排到好後，因為會先比左d後生先。而捐贈器官既又人唔多，未必等得到合適既腎臟。但如果家人捐比佢，驗到合適冇問題就可以安排移植，就唔洗等候。」
他們夫婦育有兩女一子，當時有兩個仍在大學分別攻讀碩士及學士課程，另一個只12歲仍是個小學生。為著捐腎救爸爸一事，Dena開了一次家庭會議「我將件事講左比仔女聽，等佢地自己分析決定去唔去驗。明白仔女都有救爸爸既權利，如果佢地願意我唔會勸阻佢。同時都冇迫佢地，表明如果佢地唔願意亦唔會有任何意見。而且，我希望佢地可以透過呢個咁難決擇既課題，學習獨立思考同承擔後果。」 在訪問中，Dena不只一次提及維繫一個家庭的重要性，抱一個開放的心態彼此尊重是不二法門。結果，兩名成年子女、Dena自己加上她丈夫的
哥哥共4人，都去了醫院作檢驗，全部都適合作捐贈。
檢驗結果出來後，跟醫生商量過，Dena認為自己應該是適合作捐贈的人選。因為手術始終存在一定風險，丈夫的哥哥年紀太大，而2名子女尚年青。而且要幫忙的，是自己的結髮丈夫，最親愛的另一半，她不承擔誰來做？所以就決定了由Dena來做活體捐贈。
「換腎之前醫院會好詳細檢查，驗都驗兩次，確保唔會出錯。而且，因怕捐贈者心理質素唔足夠承受改變或手術失敗，捐贈前醫院會安排臨床心理學家作評估。」講到心理質素，Dena給我講了一件趣事。「記得手術當日，被推入手術室訓豈度等，周圍既醫護人員都好緊張預備。其中一個姑娘走過黎甘問我『點呀，緊唔緊張？』我笑笑口答『有咩甘緊張？我負責訓豈度，你地辛苦D』姑娘話我居然仲識講笑，甘即係冇問題啦。」Dena的回答叫人哭笑不得，但卻也是事實。樂天知命，把自己可以的盡力做好，把其他不能控制的交託其他伙伴，並對之存有信心，困難也不再那麼可怕。「我覺得醫生同護士都好專業細心，老公甘多年覆診都跟進得好好，所以好信任佢地。我地換腎兩個人，但就有一組人服侍。主診醫生同我講，其實佢仲大壓力過我，要豈一個活生生既人身上攞個器官出黎放落第二個度，萬一失敗左唔知點交待。」 最後手術進行成功順利完成。
捐腎後，換來十年幸福的時光，
可以有機會一起經歷子女畢業、結婚、生子，那些難忘片段，彌足珍貴。
手術過後，Dena跟丈夫分別住不同層數的病房，兩人張開眼都第一時間問:「我老公/老婆點呀?」他們夫婦本就恩愛，移植手術把二人更緊密地連結在一起。Dena丈夫手術康復情況理想，往後十年她們一家渡過了很快樂的時光 「到而家睇返轉頭，我認為捐腎比我老公非常值得，因為咁做比左我地十年既時間，一家人可以一齊經歷仔女畢業、結婚、生仔，呢d開心難忘既時刻。」 Dena說。同時，因著移植手術Dena丈夫的身體轉好，生活質素也大為改善，也可以自己駕駛外出，並到外地旅遊，那是移植前幾年不可能的事。
十年後，逆境再次到來。2008年7月，Dena丈夫因膀胱癌入院，她毅然決定提早退休，為爭取時間照顧丈夫，一同面對更艱難的時間。「我地大家都有一個共同目標，就係維持家庭和諧完整。老公好堅強樂觀，病左甘多年，佢都一直積極接受治療，冇諗過放棄。我覺得佢好叻，成日都引導同比方向我，可能因為佢大我12年啦。」在Dena的言語中，不難察覺到她對丈夫的仰慕與欣賞。
如Dena丈夫所講，任何人都敵不過時間，無論你是什麼人身份如何尊貴，我們都需要面對死亡。她丈夫在2013年6月，因治療癌症後受感染而不幸病逝，「佢過身前半年，過得好辛苦，每日醫院屋企兩邊走。後尾佢又患上肺癌，做晒手術同電療，醫好晒架喇……可惜免疫力太低受左感染，入左ICU就再冇出返黎。」 在一旁聽Dena憶述，都能受感到那種心痛。
摰愛伴侶離世，加上平日生活都是忙著照顧丈夫，突然什麼都不需要再做了，那種空虛心痛的感覺，縱然早有預備，但到來臨的時候仍很難接受適應。「雖然佢走左，但一開始果陣，仍然會覺得佢仲豈我身邊。」 Dena朋友知道她的情況，就介紹她參加馮華添教練(添SIR)的訓練班，讓她有個寄託之餘也可鍛鍊身體。「當時我覺得，上跑班都好呀，老公其實都唔想我成日唔開心，長期係甘對家人都好有影響。」
每季跑班開課前，添SIR都會有一個講座，解釋長跑理念及注意地方，「講座上，添SIR解釋唔需要體能好好，按自己能力肯試就可以，聽完之後信心大左。」在上跑班前Dena未曾想過跑馬拉松，但班上氣氛很好也帶動了自己不少。2014年10月在大阪參加了她第一個全馬，2015年完成了名古屋及雅典的全馬賽事，今年2016剛完成香港渣打馬拉松並順利PB。「跑步之後瘦左差不多10磅，著既衫由大碼變左中碼。健康左，精神都好左，反應都快D。而且因為跑步結識左好多朋友，大家周圍去跑馬拉松兼旅行，生活好開心精彩。」人生下半場，Dena選擇了踏上馬拉松之路，享受退休人生。
2014年大阪馬拉松
2015名古屋女子馬拉松
很多人都接受不了把離世親人的器官捐贈他人，一來要處理親人離開的傷痛已不好受，再來傳統觀念都希望保留遺體的完整，我問了Dena對此有什麼看法。「我明白親人離世會好難受，但如果呢個係離世親人生前既意願，作為家屬好應該幫佢完成最後既心願，因為可以幫佢做到既事已經唔多。」其實為挈愛親人打理後事是出於關愛，何不完成其生前遺願，祝福有急切需要的家庭，讓等待器官延續生命的病患者有重生的機會。
附：器官捐贈網上登記
