京都馬遊記一直拖.... 拖左一個月都未寫比賽篇.....
一晚同京馬團友聚餐，佢地問 :[其實你京馬仲會唔會寫架?] XDDD
當然一定要寫啦~! 好，就等我快快搞埋佢。
京都馬比賽日天氣唔錯，冇我想像中甘凍，當日都有8度。
朝早，我地一行4人由民宿出發~!!
現場寄行地區域掛滿[京]字旗。
自拍是常識吧 XDDD
由於小妹實在太怕凍，加上身體欠佳.... 所以就甘重裝備上陣 XDDD
似行山多過跑，冇計... 唉，我都唔想。
話說京馬係冇紀念TEE送，反而有條萬用魔術圍巾。甘大家當然要好好善用啦~!
下面係其中用法... 預備去打劫42.195KM再搶埋個完賽牌 XDD
而大會比既指引，有下面"耍盲雞"既用法。
有朋友話係用作眼罩訓覺用，但甘緊點訓呀??
起步時天色好好，有太陽... 我都唔洗著褸。
但到中段就天陰陰，又大風.... 帽都差D吹甩。
雖然小妹真心郊遊，但比賽總要講返返條賽道，整返張路線圖過大家先。
京馬賽道有幾個特色:
1) 長命暗斜: 唔會好斜，甚至暗到你都唔覺，但又長甘先致命。唔留意就會豈果D路段加快左，體力分配要控制得好小心。
2) 大風: 京馬豈2-3月舉行，天氣比較清涼(對我黎講係好凍，我真係發冷的)，而部份路段豈河邊同山上，會比較大風，但當日跑又未至於會吹返你轉頭果種。如果怕凍人士，比如我呢D，預備多件風褸比較妥當。
帽都差D吹甩....
3) 補給冇預期中多: 因為頭兩隻都係跑台灣馬，佢地超級多既補給已寵壞左我....
加上小妹好易肚餓，補給於我黎講真係好重要。
前年去奈良10KM，聽同行全馬朋友講有紅豆湯、拉麵等等... 令我對京馬好有期望，反正郊遊就食盡佢。可惜，廿幾KM前冇咩特別食物補給，記得17-18KM開始有類似旺旺仙貝既米餅派.... 去到廿幾KM有京八橋/生果/麵包之類。補給叫OK，但冇我期望中多，好彩有可樂糖同2包GEL.... XDDD
每次見到呢個牌，都比到我力量
"前面可以抖抖喇!"
民間補給豆沙包~! 見到感動到喊出黎 T.T
4) 沿途風景唔錯: 經過好多京都名勝同風景區，如果小妹唔係腳痛相信會更ENJOY~! 係唔錯既旅程。
講返自己先.... 今次京馬比我深切體會..... 做人唔應該甘勉強.....
怪自己太貪心，人報我又報。自從舊年12月廣州已經開始出事，1月渣打，諗住2月過埋京都就可以好好休息。但京都出發前2星期，有一次豈街行行下突然好痛，腳背至腳板底突然抽住，但又拉唔到..... 要除鞋按鬆佢先行得返。第二日睇骨科過筋腱發炎，應該係overload加勞損.... 右腳膝頭、腳背同腳底都中招。當時真係好怕自己行都行唔快會DQ，但點都想完成佢，就努力食藥做物理治療..... 玩左幾千蚊，好彩有得claim。
但京馬返到香港，到屋企就驚見自己已慘變豬蹄 (究竟我係點完賽同之後觀光.... 係一個謎....)
京馬頭幾km都順，氣氛狀態都可以，見到鏡頭擺下post。
幾精神~! 果時仲好ok架~!
呢張好搞笑，前面果位好似影緊我甘
(利申: 大家互不相識)
其實我知道，如果唔太攰或太快，應該繼續係冇問題... 最緊要唔好比肌肉太拉緊。
之後就同自己講: [點都好試左先啦.... 行下跑下..... 要完賽唔係冇可能。] 就急忙上路，希望可以盡量趕d時間，萬一真係要慢行都有buffer休息一下。
行下跑下隻腳又鬆少少，又可以繼續跑..... 突然間比我見到5:00既pacer，我心中閃過一絲希望有機會sub 5，就死跟....... 點知pacer既pacing都係呃人既，手錶顯示pacing竟然係5:xx/km.... 被拉快左一段後我決定放棄，因為右腳又開始投訴..... 貪快萬一完唔到仲死...... 完賽牌係目標，一定要保住，所以之後又再行下跑下。
沿路一直趕趕忙忙，其實冇咩心機欣賞周圍事物。有一樣就幾深刻既.... 當地民眾都帶埋小朋友，狗狗出黎打氣。有一隻白色柴犬由一位老爺爺抱住豈賽道旁圍觀，我上前摸摸柴柴個頭，佢有氣冇力甘想咬我，就知道狗狗健康唔太好，可能行動不便。
柴犬生性好奇，鐘意熱鬧，如果成日困豈屋企會唔開心，老爺爺抱佢出黎湊熱鬧真係好有心。要知道，我家toffee冇佢甘大隻都有20磅，要抱甘耐真係有難度。
到30KM打後我行既路就越黎越多，好心急又怕被捉上車。跑唔到都非常專心急步行，什至快過一D慢JOG既人。中間又除左一次鞋按腳，核突死......
要知道京馬有幾段來回路段，會見到對面線...... 見到對面線架追尾車，雖然明知差2-3km，但心入面個壓力都幾大。就急急腳快步行，可以就跑幾步，keep住大約8分半pacing預計5:45左右完賽 (個人時間5:44，差不多)。收尾10KM個人一直趕一直趕，都唔知發生咩事 xddd
終於比我去到40km，見到鏡頭扮下野先~!!
最後順利完成~!
之前每次都唔記得，今次過線之後我有回頭鞠躬，真心感謝可以平安完賽。
呢塊完賽牌重要囉~!
京馬當日特別號外出得勁快，跑完已經有得派。
京馬後，我決定2016 六月前都唔再報其他全馬賽事.... 好好休息，再好好操練。
唔想再玩甘多... 事實係京馬返黎後身體一直反反覆覆，感冒冇完全好過.... 臉上生左好多好大粒既瘡...... 上星期六既Nike women 10km都跑到我氣咳..... 真心唔憤氣加擔心....
唉，無論如何，我會努力嘗試。
完賽過後去左浸溫泉，好舒服。再食左兩轉居酒屋，飲左少少酒慶祝。
只要有好朋友一齊，就熱鬧開心 :)
期望下次再有機會同大家去玩去癲，又可以做個好成績~! 等我呀~! XDDD
